Sunday, September 17, 2006

جعلوني مهندسا.......:(:(:(:(:(


يااااااه.. النهاردة كان اول يوم في الكلية...بقيت في سنة تالتة ماحدش يقوللي مبروك وكل سنة وانت طيبة والحاجات دي مش عارفة بيقولوها ليه المفروض يقولو نشاطركم الدراسة ...ربنا يجعلها اخر المحاضرات...ما نجيلكوش في سكشن...كده يعني...وسبحان الله كل سنة في اول يوم احس نفس الاحساس هوه بغباوته..احساس ما لوش اسم ولا وصف ولا علاج واللي همه يعرفه اوي يعني هو احساس بالخنقة كده خلوها سبت خلوها حد والله نفس الاحساس برضه....كنت فاكرة المشكلة في يوم السبت وكنت مصبرة نفسي بس المصيبة ان المشكلة طلعت فيا انا حتي لو خلوها خميس ححس نفس الاحساس بس اليوم ده انا بحس فيه براحة يارب مايغيروش رايهم ويقلبو ع الخميس ....انا ايه اللي دخلني الكليه دي مالها تجارة ولا اداب وحقوق لو حتي انتساب ...بس نقول ايه بقي غاوية مرمطة....والله انا كنت كويسة زمان من حوالي كام سنة كده قبل ما ادخل كلية الهلوسة...كنت بفرح والله وكنت بنام زي الناس الطبيعيين يعني... وكنت استغفر الله يعني بخرج اتفسح....دلوقتي بقي تعالي ايام المشاريع والتبييض كلمة نوم دي تبقي وسوسة من الشيطان...ولا بقي لو اتخبطت في عقلك وقلت اتفسح....ياللا بقي مش عايزين نخوف حد من الكلية ...دي جميلة اااااااوي ....والدكاترة حنينين صوتهم ما بيعلاش ابدا.... والشغل خفيف واللوح ع القد يادوبك كام لوحة كده تعملهم قبل النوم...ده ان نمت اصلا ..احم احم قصدي يعني من كتر السعادة اللي انت حتحس بيها وانت بترسم يعني.... انا مش قصدي حاجة ....النهاردة ماكانش عندي الاولي اما التانية بقي الله ما يوريكم كان عندي محاضرة تصميمات تنفيذية بالذمة ده اسم يقابلوا بيه ربنا المهم المادة دي للي ما يعرفش يعني دي مادة كده مملة وخنيقة واتهد حيلي فيها السنة اللي فاتت وفي الاخر جبت جيد يعني الحمد لله ع كل حال بندرس فيها مراحل انشا ء مبني وطرق التنفيذ وحاجات كده ما تشغلوش بالكو انتو مش عايزة اقرفكو...المهم الدكاترة دخلو في ميعادهم وما لطعوناش وبسرعة في حدود ساعة وشوية كده قالو مضمون المنهج والمواعيد وتخيلوا قالولنا مواعيد التسليم بتاعة الشيتات والمشروع النهائي والامتحان اه والله تخيلوا في اول يوم كده وش ع طول . وقالنا انتو فاضلكو معانا سنة وكام شهر كده وتتخرجو..شدوحيلكو ...بالذمة ده كلام؟؟؟..لسه بنقول يا هادي طب واحدة واحدة وبلاش كل ده ييجي مرة واحدة...بالذمة في في الدنيا دي بالسرعة دي حد بيتخرج ..مش عارفة ..ولا بيتوظف ...انا خايفة ..اتعين بعد ما اموت ...مع الاعتذار للاغنية.....يالا بقي مفيش كلام تاني اصلي حقول ايه بقي؟ الله يسامح طموحي ومجموعي وهوايتي واهلي ومكتب التنسيق بقي.. ):):): ... ...جعلوني مهندسا.. (:(:(: مع الاعتذار للمجرم

14 comments:

عازفة الكمان said...

لا خول ولا قوه الا بالله معلش هي في الاول كده ومعلش ليه ما انا معاكي في المرمطه ما الهم طايلني وطايلك نصيب ... بس حلوه جعلوني مهندسا دي

Nouran said...

حرام عليكي يا بنتي طب صبري العيال الغلابة بتوع اعدادي-انا يعني-حرام عليكي بس هي باينة من اولها ربنا معاناااااااااااا

أُكتب بالرصاص said...

السلام عليكم

ما تعمليش في نفسك كده

على فكرة
عجبني العنوان

وبعض الإفيهات الخفيفة في البوست

عايزك كده تشدي حيلك وتاخدي التسع سنين مرة واحدة

مش عايزين تأخير

اشوفك على خيرة الله

Captain L.J.Silver said...

gamda awi "ga3loony mohandesan m3a el e3tezar lelmogrem " deeh ..we ba3dain fe3lan el kolleya beta3etna gameeeeeeela we ya salam kaman en el2agaza ba2et kollo yoom elsabt deeh we ba2eeet el2ayyam ba2et za7ma moot deeh ba2et 7aga agmal we agmaaaaaal we el za7ma wa2t el break ya slaam ..!! 7atta tela2eeny qarrat mageesh ba2eet el osboo3 men kotr el sa3ada !!!!! we salmeely 3la mabna 3emara !

مـحـمـد مـفـيـد said...

بوست جميل اوي
اولا كل عام وانتي بخير بمناسبه الشهر الكريم مش الدراسه
ثانيا\
والله ايام الدراسه من اجمل الايام في حياه الانسان ولا يعرف طعمها الرائع الا بعد ما يخرج منها فاستغلي هذه اللحظات الجميله حتي لا تجلسي مستقبلا في مقاعد المشاهدين لها وتندمي عليها
وشكرا للتواصل

مـحـمـد مـفـيـد said...

بوست جميل اوي
اولا كل عام وانتي بخير بمناسبه الشهر الكريم مش الدراسه
ثانيا\
والله ايام الدراسه من اجمل الايام في حياه الانسان ولا يعرف طعمها الرائع الا بعد ما يخرج منها فاستغلي هذه اللحظات الجميله حتي لا تجلسي مستقبلا في مقاعد المشاهدين لها وتندمي عليها
وشكرا للتواصل

hebaz said...

welcome to the club :)
تقدرى تقوليلى بقوة " أنتم السابقون و نحن اللاحقون" حاولى تستمتعى بأى حاجة و بأى لحظة فى الكليى لأن مع الألم و مع الأسف شغل الهندسة المعمارية بعد كدة حالته تغم:( و أسألينى أنا!
و دايما كنت بقولها و حفضل أقولها! مالها كلية التجارة؟ على اللأقل بتنامى و بتبقى بنت حلوة كدة و فيها الروح
يلا خير كلنا لها

...دنيتي said...

هههههههههههههههه
دمك زي العسل بكرة تتخرجي زي اختك كدة وتزعلي اوي على الأيام دي


نشاطركم الدراسة
وكل سنة وانتي طيبة ورمضان كريم :)

Nouran said...

علا شكلك بيتريق عليا قولي الحقيقة انا هعيط

حدوته مصرية said...

نفس المرمطة دى عندى برضه مع مشاكل اكبر احمدى ربنا على اللى انتى فيه انا زيك سنة تالتة عمارة بس اول دفعة يعنى مفيش اكبر منى ومش دى المشكلة بس حبيت اوريكى حاجة يعنى

Captain L.J.Silver said...

I was really happy when i saw ur comment on my last post ...enty fain ya benty ???? ana 2olt 7`alas enty battalty tadween...anyway...eb2y 7`aleena neshoofek b2a every now and then ..we yalla b2a i guess it`s time for a new post ..walla a???

P.S : Since i dont have ur mail I was forced to send my reply to u as a comment ...sorry @

sherif said...

عارفه ايه المشكله بجد


ان كله محصل بعضه

محسوبك خريج هندسه و طلع عين اهله في الكليه
وفي الاخر فكك

كله زي بعضه و الواسطه هي اللي بتسنجفك

Anonymous said...

أطيب أمنياتي .وصادق دعواتي لكم .بجمعةٍ مباركةٍ إن شاء الله .وتقبل الله منا ومنكم صالح الأعمال .إنه سميع خبير عبيد خلف العنزي

Unknown said...

thank you

سعودي اوتو