Thursday, May 08, 2008

صحيت لقيت قلبي حزين

قلتله مالك يا مسكين

قاللي لسه سامعة الانين

ده جوايا بقاله سنين

قلتله تعالي نتصافي

يمكن من المك تتعافي

قوللي ايه شكوتك

احكيلي عن بلوتك

شاور علي عقلي وقاللي

بتفكري بده تملي

وناسية اني منك

ويهمني اللي يهمك

وانا فاكرة انه سهل دواك

بقي كل ده كان جواك

بص ياقلبي واسمع بعقل

انا بسال عقلي قبل

بس خلاص ما تكمليش

يعني دوري في حياتك مفيش

يعني ايه ابقي التاني

وعقلك دايما واخد مكاني

اصلي خايفة عليك

قرارك دايما حياذيك

عقلي اصله قوي

وانت ضعيف اوي

وزاد النبض وقاللي

دايما ظالماني تمللي

وعايز ايه دلوقتي

عايز تبقي الاول

برضه مش فاهماني

يووووه حعيد من الاول

عايز فرصة لازم

عايز مرة لو

وماترجعش نادم

لو طبيت ياحلو

وعد الحر دين

سيبيني مرة حر

واجيب دواك منين

لو دقت بعده المر

جربي ومش حتخسري

ومرة بيا فكري

رايح فين يا مجنون يا

لسه القرار ما صدرش

شايف حب هناك بيقوللي.. ما تتاخرش

Friday, April 13, 2007

بنت من شبرا

بيقولو ان الواحد بيرتبط اوي بالمكان اللي اتولد فيه....تفتكروا ان ده سبب حبي وارتباطي الغريب بشبرا..او يمكن لان شبرا لازم تتحب وتتعشق ..الموضوع بدا بيوم ولادتي في اوضة تيتا وتحديدا بشارع واصف سعد الساعة تقريبا 12 يوم 30\8 تقريبا كان يوم احد...من ساعتها ارتبطت بشبرا ارتباط غريب واصبحت انا اكتر واحدة في اخواتي واولاد خالتي التي اذهب لشبرا بصفة مستمرة ...دائما اشعر بالحنين لها اشعر انني اسكن هناك اشعر انني جزء منها...اصبحت جدتي تعيش بمفردها احسست ناحيتها بالمسئولية وزاد ذهابي لشبرا وزاد تعلقي بها ....معالمها مرتبطة بذهني ومحفورة في الذاكرة كنت وانا صغيرة الفسحة الحلوة بالنسبة لي هي اني اروح شبرا مع ماما ونركب الاتوبيس وننزل في محطة الترعة وكنت بعلمها بالبقال اللي لونه اصفر وكانت تيتا تضحك وتقولي يعني لو دهن لون تاني مش حتيجي تشوفيني.....وكنا ننزل من عند تيتا وكنت دائما ارفض النزول من عند تيتا ولكن كلمتي كانت بتنزل الارض كل مرة امام عرض مغري من امي انها تاكلني ايس كريم واحنا مروحين من مدبولي وده حلواني مشهور في شبرا وكنا نقف ناكله ع المحطة ....وكنا بنجمع عند تيتا في رمضان والعيد وكنا ننزل انا واخواتي واولاد خالتي نتمشي بعد الاكل وكان كبيرنا ننزل نلف شوية ونجيب بالونات وبمب وصواريخ ونطلع نلعب بيهم وكنا نضحك في هذا اليوم من قلبنا بجد .....ياااااه ادفع نص عمري وترجع الايام دي تاني(ادفع 10 سنين يعني).....كبرت ومرت الايام اتغير العالم واتغيرت الشوارع وفتحت محلات وغيرها قفلت لكن تفضل شبرا هي شبرا بجمالها ورائحة هواها يا سلااااااااااام عليكي ياشبرا ... بعد خط المترو ما اتعمل بقينا نروح لتيتا بالمترو واصبح الموضوع ممل لان الاتوبيس كان بيخليني اتفرج ع الناس والشوارع تحس انك عايش (بعيدا عن كل مساوئ الاتوبيس يعني)...المهم انا دلوقتي رجعت تاني اروح وارجع بالاتوبيس كاني عايزة ارجع ايام زمان تاني ....ياسلام افتكرلك ايه ولا ايه ياشبرا احلي سلام لشبرا يعني الدوران يعني مدبولي يعني دوللي يعني احلي ايام ...........ياسلاااااااااااااام عليكي ياشبرا

Sunday, September 17, 2006

جعلوني مهندسا.......:(:(:(:(:(


يااااااه.. النهاردة كان اول يوم في الكلية...بقيت في سنة تالتة ماحدش يقوللي مبروك وكل سنة وانت طيبة والحاجات دي مش عارفة بيقولوها ليه المفروض يقولو نشاطركم الدراسة ...ربنا يجعلها اخر المحاضرات...ما نجيلكوش في سكشن...كده يعني...وسبحان الله كل سنة في اول يوم احس نفس الاحساس هوه بغباوته..احساس ما لوش اسم ولا وصف ولا علاج واللي همه يعرفه اوي يعني هو احساس بالخنقة كده خلوها سبت خلوها حد والله نفس الاحساس برضه....كنت فاكرة المشكلة في يوم السبت وكنت مصبرة نفسي بس المصيبة ان المشكلة طلعت فيا انا حتي لو خلوها خميس ححس نفس الاحساس بس اليوم ده انا بحس فيه براحة يارب مايغيروش رايهم ويقلبو ع الخميس ....انا ايه اللي دخلني الكليه دي مالها تجارة ولا اداب وحقوق لو حتي انتساب ...بس نقول ايه بقي غاوية مرمطة....والله انا كنت كويسة زمان من حوالي كام سنة كده قبل ما ادخل كلية الهلوسة...كنت بفرح والله وكنت بنام زي الناس الطبيعيين يعني... وكنت استغفر الله يعني بخرج اتفسح....دلوقتي بقي تعالي ايام المشاريع والتبييض كلمة نوم دي تبقي وسوسة من الشيطان...ولا بقي لو اتخبطت في عقلك وقلت اتفسح....ياللا بقي مش عايزين نخوف حد من الكلية ...دي جميلة اااااااوي ....والدكاترة حنينين صوتهم ما بيعلاش ابدا.... والشغل خفيف واللوح ع القد يادوبك كام لوحة كده تعملهم قبل النوم...ده ان نمت اصلا ..احم احم قصدي يعني من كتر السعادة اللي انت حتحس بيها وانت بترسم يعني.... انا مش قصدي حاجة ....النهاردة ماكانش عندي الاولي اما التانية بقي الله ما يوريكم كان عندي محاضرة تصميمات تنفيذية بالذمة ده اسم يقابلوا بيه ربنا المهم المادة دي للي ما يعرفش يعني دي مادة كده مملة وخنيقة واتهد حيلي فيها السنة اللي فاتت وفي الاخر جبت جيد يعني الحمد لله ع كل حال بندرس فيها مراحل انشا ء مبني وطرق التنفيذ وحاجات كده ما تشغلوش بالكو انتو مش عايزة اقرفكو...المهم الدكاترة دخلو في ميعادهم وما لطعوناش وبسرعة في حدود ساعة وشوية كده قالو مضمون المنهج والمواعيد وتخيلوا قالولنا مواعيد التسليم بتاعة الشيتات والمشروع النهائي والامتحان اه والله تخيلوا في اول يوم كده وش ع طول . وقالنا انتو فاضلكو معانا سنة وكام شهر كده وتتخرجو..شدوحيلكو ...بالذمة ده كلام؟؟؟..لسه بنقول يا هادي طب واحدة واحدة وبلاش كل ده ييجي مرة واحدة...بالذمة في في الدنيا دي بالسرعة دي حد بيتخرج ..مش عارفة ..ولا بيتوظف ...انا خايفة ..اتعين بعد ما اموت ...مع الاعتذار للاغنية.....يالا بقي مفيش كلام تاني اصلي حقول ايه بقي؟ الله يسامح طموحي ومجموعي وهوايتي واهلي ومكتب التنسيق بقي.. ):):): ... ...جعلوني مهندسا.. (:(:(: مع الاعتذار للمجرم

Saturday, September 16, 2006

اجندتي العزيزة....شكرا

  1. يااااه.....وحشتيني يا نفسي بقالنا مدة ما خدناش وادينا مع بعض....عاملة ايه في الدنيا دي؟؟؟ عاملة ايه مع البشر؟؟؟ ...لو حد مزعلك شاوريلي عليه بس.....فاكرة زمان يا نفسي لما كنت كل يوم اكلمك ...يااااااااه اجندتي العزيزة وحشتيني عارفة ..عارفة انك زعلانة مني عشان انت فاكرة اني استغنيت عنك بعد ما بدات البلوج وكمان بداته من غير ما اقولك ....ليكي حق تزعلي مني....وتقولي كل اللي في نفسك...ايه بتقولي ايه خللي بلوجك ينفعك...قصدك ايه بالكلمة دي انت زودتيها اوي ...لا لا خلاص ما تزعليش انا لازم استحملك زي ما ياما استحملتيني.. ياااه وعشان تعرفي اد ايه انا بعزك اكتر من ...ولا بلاش احنا دلوقتي ضيوفه لما انشر الموضوع ابقي اتكلمي براحتك....انا حكتب عنك هنا مع اني ما كتبتش عن البلوج عندك......ياااااه يا اجندتي العزيزة اتذكر اول مرة كتبت فيكي وكيف كنت غريبة علي في الاول وكنت اتحدث معك بحذر عشان ما اعرفكيش...وواحدة واحدة خدنا ع بعض وبقيت احكيلك ع كل حاجة خصوصا بعد ما اتاكدت انك امينة وبتحافظي ع اسراري.... فاكرة يا اجندتي لما كنت ارجع من برة متضايقة واترمي في حضنك واحكيلك وانت تسمعيني وما كنتيش تزهقي مني ابدا وكنتي بتسمعيني لاخر كلمة....فيه كده:؟؟:::::::فاكرة فرحتي بنجاحي في تالتة اعدادي؟؟ وفاكرة حلمي اجيب مجموع في ثانوي..## وفاكرة كل يوم قبل النوم اما كنت اقعد احكيلك واقولك انا خايفة ونفسي ادخل هندسة....وشاركتيني فرحتي بدخولي الكلية ووقفتي جنبي في اول ايام الكلية وكنت حاسة بغربةبسبب بعد اصحابي وتغيرهم...فاكرة؟...وكنت حاسة بغربة مع نفسي وساعدتيني اصالحها واتكلم معاها من غير ما حد يتدخل بيننا ازاي انسالك كل ده؟؟.... ده حتي اللي مالوش خير في اجندته ما يبقاش ليه خير في بلوجه ...ما تزعلش يا بلوجي انا مع الحق...وبعدين انا ما اقدرش استغني عن حد فيكو انتو الاتنين بقيتو بتكملو بعض كل واحد فيكو ليه دور وبعدين كمان يابلوجي.. انت يادوب لسه عارفاك من كام اسبوع اما اجندتي فدي بقي عشرة عمر...كفايه عياط بقي يا اجندتي بليتي كل مذكراتي حتبوظيها...انا قلت فيكي كلمتين حلوين اهه ...(:(:(:(:....ومهما حصل عمري ما استغني عنك ابدا..... مع ان البلوج اسهل وامكانياته اعلي بس برضه ما اقدرش استغني عن القلم الازرق الحبر وورقك الصغير المسطر الابيض الجميل,...اللي عمره ما قاللي معلش انا مش فاضي دلوقتي...وعشان كل ده انا عمري ما استغني عنك ابدا ياجوجو ...يا جيجي..ياجميلة ابداا اجندتي العزيزة......شكررررا

Wednesday, August 30, 2006

النهاردة بقي عمري عشرين



  1. النهاردة بقي عمري عشرين- ياااااااااه عمر والله- وما كنتش مرتبة لليوم بس كان جامد جدا ويمكن لو كنت رتبتله ما كانش يبقي جامد كده >>>>>>>>المهم النهاردة بجد كان تحفة من احلي ايام حياتي فعلا.......صحيت النهارده في حدود الساعة 11ورحت الكلية ع اساس ان انا حروح انا ورشا نشوف اخبار التدريب ايه والورق وكده يعني وبعدين نقضي اليوم زي كل سنة نخرج بقي وكده.... المهم رحت متاخر كالعادة ولقيت كل اصحابي موجودين بجد وجودهم لوحده كان مفاجاة ليا وبعدين انا كنت فاكراهم ما يعرفوش بس يا مامنة لايمان يا مامنة للميا في الغربال ايمان دي واحدة من اصدقاء التدريب يا دوبك عرفت انه عيد ميلادي ونشرت الخبر اولا قالته لعمرو يبقي ضمنا مصر كلها تعرف وبعدين عملولي مفاجاه تانية قالوا انهم رايحين يصلو وفي الخباثة كده راحو جابو جاتوه وبيبسي وشمع واحتفلنا وكان يوم تحفة بجد قضيت يوم جامد جدا وبجد مهما قلتلهم مش حعرف اشكرهم ع اليوم ده انا فرحانة كمية فرحة تكفيني مثلا اسبوع من غير زعل حتي لو مين عمل ايه برضه مش حزعل والله بجد ممكن تعرف ناس لمده قليلة اقل من شهر مثلا وتحس انك تعرفهم من سنين بجد هو ده احساسي معاهم..... هما بجد كلهم ع بعض كده حاجه حلوة حصلتلي في حياتي........... بس يا خسارة الايام الحلوة بتعدي هوا التدريب خلص ومش حنقدر نتجمع تاني كلنا بس المهم ان احنا قضينا ايام بجد ما تتنسيش بجد شكررررررررررااااااا< ايمان-رشا (انتيمي)-علا- علي- عمرو- فاطمة- كريم> حقيقي انتو خليتو عيد ميلادي ما يتنسيش ابدا

Thursday, August 24, 2006

ضحك ولعب وجد و........وبس

ده اول بوست اكتبه...كتير حيقولوا ايه البدايه الغم دي اول ما يقروا الموضوع وحينخدعوا من العنوان...وحيقولو صحيح.. البوست مش بيبان من عنوانه.........بس والله انا بقالي كام يوم الموضوع ده شاغل دماغي حتقولو موضوع ايه اخلصي بقي........الموضوع مالوش اسم او ممكن نسميه واخرتهاايه؟..... لانه عبارة عن مجموعة خواطر وحاجات حصلت اليومين اللي فاتو وبتحصل كل يوم ..وكل يوم بيعدي ضحك ولعب وجد وحب و....وبس ما بنحبش نشغل دماغنا بحاجة تانية واخرتها ايه؟...ما اهي اخرتها الحاجة برضه اللي ما بنحبش نفكر فيها...وحاسين انها بعيدة اوي كبير وصغير بيموت غني وفقير ....... اشمعني انت اللي مش حييجي عليك الدور.... .كل كام يوم اسمع عن حد مات ومش حشوفه تاني ياتري كان مستعد وياتري كان ايه اخر حاجة بيعملها قبل ما تيجي اللحظة الفاصلة وياتري دوري امتي....وحكون بعمل ايهياتري حموت وانا بسمع اغاني مثلا ولا حموت وانا بصلي ولا وانا نايمة او او او.........النهارده قربت بوست لزميل بلوجي وتاثرت جدا بكلامه عن والده ياريت تقروه احسن عشان تحسو انا عايزة اقول ايه.... هو كمان اللي شجعني اكتب اول بوست عن الموضوع ده.......... .من كام يوم كنت انا واخويا نازلين نشتري بدلة لزوم فرح بنت خالتي وكنا فرحانين جدا وكل اللي شاغل دماغي ساعتها الفستان والفرح ووووو........كل الحاجات بقي اللي بنفكر فيها لما نكون عندنا فرح......المهم واحنا في الطريق عدينا ع مقابر..اول ما عدينا عليها قلبي انقبض
ورغم ان الاتوبيس كان زحمة والناس صوتها عالي الا اني احسست باني لا اسمع احد واني اصبحت وحدي واحسست ان الدقيقة اللي استغرقها التوبيس وهو يعبر هذه المنطقة وكانها عمر.....واخذت عيناي تمران اللافتات المعلقة ع بوابات المدافن واقرا<مدفن الحاج ...> وبعده< مدفن المغفور له الحاج..> واخذت احس كاني اسمع اصوات هولاء الناس لا ما تقولوش ايه الخيال الواسع ده........انا قصدي ان انا تخيلتهم في حياتهم وكيف كان شبابهم ياتري مروا من نفس المكان قبل كده.. وياتري كانو يتخيلوا انه سيكون فيه نهايتهم ..........كل يوم الواحد بيبقي معاه وحواليه ناس كتير جدا وعلاقات كثيرة لكن انا لما عديت ع المقابر ما لقيتش حد حنبهم .......انت بتكون لوحدك ...وبعد ما الاتوبيس عدي من ع المكان ده لقيت الدنيا اتغيرت لقيت الحاجات اللي احنا متعودين عليها....الانوار والمحلات الكبيرة والعربيات والضوضاء والخناقات...........وكما هو الانسان لحظات ونسيت كل اللي حسيته من دقائق قليلة واندمجت في العالم الصاخب مرة اخري الا اني احسست انني تركت جزء مني اثنا ء عبورنا بجانب المدافن جزء من روحي المشتاقة لربها والتي مللت من هذا العالم هي لم تخلق لهذا العالم بل خلقت لشئ اخر ......وذهبنا لشراء البدلة ورجعنا البيت ونمت ليبدا يوم جديد ضحك ولعب وجد ..........وبس ........ وللحديث بقيه

Sunday, August 20, 2006

اخيررااااااااااا

وبعد عناء طال مداه ........تحقق الحلم و اخيرا عملت البلوج بتاعي....مين كان يصدق يا ناس ...انا كتبت الكلمتين دول عشان البلوج يشتغل بس الشغل الجامد حيبدا بعدين ان شاء الله ما تقلقوش......... انا الاول لما سمعت عن موضوع البلوج ده بصراحه استهيفته <مع الاعتذار لحزب البلوجات>.. اجدع ناس والله .......دلوقتي انا بقيت حابه الفكرة جداومستمتعة بيه والفضل يرجع لانتيمتي هي اللي شجعتني وهي بلوجية مشهورة بالمناسبة اما بخصوص موضوع عدم اقتناعي بالفكرة في الاول عشان انا اصلا من النوع اللي بيقدس المذكرات والاسرار وما كنتش متخيلة ابدا ازاي اكتب حاجة والناس كلها تقراها ......ايه الفضايح دي طبعا قلت ع جثتي وعشان انا كلمتي واحدة اديني معاكو اهه بكتب اول بوست..انا كلمتي ما تنزلش البوست ابدااااا.........اللي خلاني اغير فكرتي ان الواحد ساعات بيحس ان الحاجات اللي بيعملها مش عايزها تبقي ليه لوحده وعايز الناس تشاركه برايها من غير ما تعرفه عشان رايها ما يتاثرش بحاجة........انتيمتي قاعدة جنبي وبتنفخ الظاهر ان انا طولت ..........اصل انا في بيتها دلوقتي هي لقت ان ده الحل الوحيد عشان تخليني اعمل بلوج انها تحبسني .................مش حطول اكترمن كده عشان الناس شكلها نامت اصلا...وانا تعبت...الي اللقاء في البوست الجاي